教育部113年3月份閩南語認證考試10月23開始報名

教育部113年3月份閩南語認證考試10月23開始報名
教育部自112年開始， 一冬會辦2擺的閩南語語言能力認證考試， 規劃佇3月佮8月舉辦。 對明年起，3月份的考試是考A、B、C三卷， 8月份的考試就干焦考A、B兩卷， 著閣特別提醒考生的是， 明年8月份的考試，A卷會頭擺改做「電腦化測驗」 （其中書寫測驗維持用紙筆作答）。
　　教育部113年3月份閩南語認證考試， 報名時間對112年10月23早起9點開始， 到11月20下晡5點， 無限定身份， 凡若有興趣的人， 攏會當佇網路報名。 報名費250箍， 19歲以下的咱優待免抾錢。 所有測驗的項目 （聽、講、讀、寫4項） 若攏考有齊著的， 就通提著1份紀念品。 113年3月份的考試簡章佮2擺考試的重要日程表已經有佇考試網站公佈囉， 明年8月份的考試簡章 （包含A卷頭擺辦電腦化測驗的相關資訊）， 時到阮會閣特別佇官網貼告示報人知。
　　113年的考試安排， 3月份這場3月初2（拜六）會考A卷； 3月初3（禮拜）考B佮C卷。 8月份這場，是8月初3（拜六）先考B卷； 8月初4（禮拜）才考A卷的電腦化考試。 所以著提醒欲考「A卷」的考生， 看是欲選3月這場考傳統用紙筆作答的考試方式， 抑是欲揀8月這場用電腦系統測驗的， 咱著先想予便。 好消息是教育部這馬已經有做電腦化測驗的線頂模擬平臺 嘛有公佈佇官方網站的「最新消息」裡矣， 歡迎考生較捷來試用看覓，是毋是有合用嘛通冗早適應。
　　有關這2場考試的資訊， 攏有共刊佇咱認證考試的網站（https://blgjts.moe.edu.tw）內底， 敬請參考。 若猶有其他考試相關的問題， 才請聯絡承辦單位國立臺灣師範大學。 電話服務專線：0800-699-566佮(02)7749-3664； 嘛有服務信箱：blg.sce@deps.ntnu.edu.tw。